Осыдан бірнеше жыл бұрын Ақтөбенің Солтүстік бөлігіндегі Елек өзені маңындағы карьерден табылған ғұн дәуіріне жататын материалдарды биыл ғылыми реконструкциялау жұмыстары жүргізіледі. Бұл туралы «Тілшіге» облыстық тарихи-өлкетану музейінің PR менеджері Сағымбек Ұлықпан хабарлады.
Бұл жұмыстарды белгілі археолог-ғалым, Ә.Марғұлан атындағы Археология институтының жетекші ғылыми қызметкері Арман Бисембаев, этнограф-ғалым, суретші Қалиолла Ахметжан және аталған институттың бөлім меңгерушісі Аслан Мамедов жүргізеді.
— Деректерге сүйенсек, Ақтөбе ғұндардың мекендеген орталығы болған. Европаға қоныс аударғанға дейін Ақтөбе өңірінде өмір сүрген. Олардың мәдениеті де ерекше болыпты.
Соның бірегейі — Елек өзені бойынан табылған ғұн дәуіріне жататын жауынгердің олжалары. Табылған артефактілерді реконструкциялау жұмыстары басталды. Оның ішінде жауынгердің киім-кешегі, қару-жарағы мен ат әбзелдері бар, — дейді Аслан Мамедов.
