БАҚ Тәжік президентінің денсаулығы нашарлағанын хабарлады

Тәжікстанда президент Эмомали Рахмонның 22 наурызда Хатлон облысына жоспарланған сапары белгісіз себептермен кейінге шегерілген, деп хабарлайды «Тілші» «Орталық Азия жаңалықтарына» сілтеме жасап.

Хатлон облысының баспасөз қызметі мемлекет басшысы аймаққа 24-25 наурызда келуі мүмкін деп хабарлады.

Өткен аптада президенттің әлеуметтік мәселелер бойынша кеңесшісі Абдужаббор Рахмонзода Эмомали Рахмон Хатлон облысына 22 наурызда баратынын мәлімдеген. Аталған облыс басшысының баспасөз хатшысы президенттің бұл сапары ел тәуелсіздігінің 30 жылдығына дайындық істеріне байланысты екенін айтқан.

Бірақ бірқатар «Твиттер» қолданушылары мен басылымдар Эмомали Рахмон ел алдында 10 наурыздан бері шықпағанын, оның міндеттерін атқару ұлына, парламенттің жоғарғы палатасының төрағасы Рустами Эмомалиге жүктелгенін хабарлап жатыр.

bne.intellinews сайты мемлекет басшысының көптен бері ел алдына шықпағанын, оның денсаулығының нашарлап кеткенін жазды.

2020 жылдың жазында президенттің коронавирус жұқтырып алғаны туралы ақпараттар пайда болған. Бірақ бұл мәліметтер расталған емес.

68 жастағы Эмомали Рахмон Тәжікстанды 1992 жылдан бері басқарып келеді. Ол былтыр қазанда өткен кезекті президент сайлауында 90,92% дауыс алып, бесінші рет жеңіске жетті.

 

Пікір үстеу

Э-пошта мекенжайыңыз жарияланбайды. Міндетті өрістер * таңбаланған